‘ਆਵਾਜ਼-ਏ-ਪੰਜਾਬ’ ਨਾਮ ਦਾ ਸੰਗਠਨ ਬਣਾਉਣ ਦਾ ਐਲਾਨ ਕਰਨ ਤੋਂ ਕੁੱਝ ਹੀ ਦਿਨਾਂ ਬਾਅਦ ਸਾਬਕਾ ਕ੍ਰਿਕਟਰ ਨੇ ਕਿਹਾ ਕਿ ਉਨ੍ਹਾਂ ਨੇ ਸਿਆਸੀ ਪਾਰਟੀ ਨਾ ਬਣਾਉਣ ਦਾ ਫ਼ੈਸਲਾ ਕੀਤਾ ਹੈ ਕਿਉਂਕਿ ਚੋਣਾਂ ਦੀ ਤਿਆਰੀ ਲਈ ਹੁਣ ਸਮਾਂ ਕਾਫ਼ੀ ਘੱਟ ਬਚਿਆ ਹੈ ਹਾਲਾਂਕਿ, ਸਿੱਧੂ ਨੇ ਕਿਹਾ ਕਿ ਪੰਜਾਬ ਦੀ ਬਿਹਤਰੀ ਲਈ ਉਨ੍ਹਾਂ ਨੇ ‘ਗਠਜੋੜ’ ਦਾ ਬਦਲ ਖੁਲ੍ਹਾ ਰਖਿਆ ਹੈ।

ਨਵਜੋਤ ਸਿੱਧੂ ਨੇ ਕਿਹਾ, ”ਫ਼ੋਰਮ ਪੰਜਾਬ ਦੀ ਬਿਹਤਰੀ ਲਈ ਕਿਸੇ ਵੀ ਗਠਜੋੜ ਦਾ ਸਵਾਗਤ ਕਰਦਾ ਹੈ ਅਤੇ ਫ਼ੋਰਮ ਕੋਈ ਸਿਆਸੀ ਪਾਰਟੀ ਨਹੀਂ ਹੋਵੇਗਾ। ਬਸ ਪੰਜਾਬ, ਪੰਜਾਬੀਅਤ ਅਤੇ ਹਰ ਪੰਜਾਬੀ ਦੀ ਜਿੱਤ ਹੋਵੇ।” ਇਥੇ ਜਾਰੀ ਕੀਤੇ ਗਏ ਇਕ ਬਿਆਨ ਵਿਚ ਸਿੱਧੂ ਨੇ ਕਿਹਾ ਕਿ ਫ਼ੋਰਮ ‘ਖੇਡ ਖ਼ਰਾਬ ਕਰਨ ਵਾਲਾ’ ਨਹੀਂ ਬਣੇਗਾ।

ਸਾਬਕਾ ਭਾਜਪਾ ਸੰਸਦ ਮੈਂਬਰ ਨੇ ਕਿਹਾ, ”ਅਸੀਂ ਸਰਕਾਰ ਵਿਰੋਧੀ ਵੋਟ ਬੈਂਕ ਨੂੰ ਨਹੀਂ ਵੰਡਾਂਗੇ ਕਿਉਂਕਿ ਇਸ ਨਾਲ ਬਾਦਲ-ਅਮਰਿੰਦਰ ਦੇ ਉਸ ਗਠਜੋੜ ਨੂੰ ਫ਼ਾਇਦਾ ਮਿਲੇਗਾ ਜਿਸ ਨੇ ਪਿਛਲੇ 15 ਸਾਲ ਵਿਚ ਪੰਜਾਬ ਨੂੰ ਸੰਕਟ ਵਿਚ ਪਹੁੰਚਾ ਦਿਤਾ ਹੈ। ਇਸ ਨਾਲ ਪੰਜਾਬ ਦੀ ਬਿਹਤਰੀ ਲਈ ਬਦਲਾਅ ਲਿਆਉਣ ਦਾ ਸਾਡਾ ਮਕਸਦ ਨਾਕਾਮ ਹੋ ਜਾਵੇਗਾ।”