ਕਾਵੇਰੀ ਵਿਵਾਦ ਕਾਰਨ ਤਾਮਿਲ ਨਾਡੂ ਬੰਦ

ਚੇਨੱਈ, 16 ਸਤੰਬਰ : ਕਾਵੇਰੀ ਵਿਵਾਦ ਮਾਮਲੇ ਵਿੱਚ ਤਾਮਿਲ ਨਾਡੂ ਵਿੱਚ ਬੰਦ ਦੇ ਦਿੱਤੇ ਸੱਦੇ ਦੇ ਸਮਰਥਨ ਵਿੱਚ ਪ੍ਰਦਰਸ਼ਨ ਕਰ ਰਹੇ ਡੀਐਮਕੇ ਨੇਤਾ ਐਮਕੇ ਸਟਾਲਿਨ ਤੇ ਕਨੀਮੋੜੀ ਸਣੇ ਕਈ ਨੇਤਾਵਾਂ ਨੂੰ ਅੱਜ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਕਾਵੇਰੀ ਵਿਵਾਦ ਦੇ ਮੱਦੇਨਜ਼ਰ ਕਿਸਾਨਾਂ ਤੇ ਵਪਾਰੀਆਂ ਨੇ ਇਕ ਦਿਨ ਲਈ ਬੰਦ ਦਾ ਸੱਦਾ ਦਿੱਤਾ ਸੀ, ਜਿਸ ਦਾ ਵਿਰੋਧੀ ਧਿਰ ਡੀਐਮਕੇ ਨੇ ਸਮਰਥਨ ਕੀਤਾ ਸੀ। ਲੋਕਾਂ ਨੇ ਇਸ ਬੰਦ ਨੂੰ ਰਲਿਆ ਮਿਲਿਆ ਹੁੰਗਾਰਾ ਦਿੱਤਾ।
ਪੁਲੀਸ ਨੇ ਦੱਸਿਆ ਕਿ ਕਾਵੇਰੀ ਵਿਵਾਦ ਕਾਰਨ ਬੀਤੇ ਦਿਨ ਆਤਮਦਾਹ ਦੀ ਕੋਸ਼ਿਸ਼ ਕਰਨ ਵਾਲੇ ਨੌਜਵਾਨ ਦੀ ਅੱਜ ਮੌਤ ਹੋ ਗਈ। ‘ਨਾਮ ਤਮਿਜ਼ਾਰ ਕਾਚੀ’ ਦਾ ਇਹ ਨੌਜਵਾਨ ਬੀਤੇ ਦਿਨ 90 ਫੀਸਦੀ ਝੁਲਸਿਆ ਗਿਆ ਸੀ। ਕੋਇੰਬਟੂਰ, ਤਿਰਪੁਰ ਤੇ ਨੀਲਗਿਰੀ ਜ਼ਿਲ੍ਹਿਆਂ ਵਿੱਚ ਬੰਦ ਦੇ ਮੱਦੇਨਜ਼ਰ ਕਈ ਅਦਾਰੇ ਬੰਦ ਰਹੇ, ਜਿਸ ਕਾਰਨ ਜਨ-ਜੀਵਨ ਪ੍ਰਭਾਵਿਤ ਰਿਹਾ।
ਸੂਤਰਾਂ ਮੁਤਾਬਕ ਕਰੀਬ ਵੀਹ ਹਜ਼ਾਰ ਛੋਟੀਆਂ ਤੇ ਦਰਮਿਆਨੀਆਂ ਇਕਾਈਆਂ ਅਤੇ ਕੱਪੜੇ ਦੀਆਂ 30 ਹਜ਼ਾਰ ਫੈਕਟਰੀਆਂ ਬੰਦ ਰਹੀਆਂ। ਸਟਾਲਿਨ ਨੇ ਚੇਨੱਈ ਵਿੱਚ ਰਾਜਾਰਤਨਮ ਸਟੇਡੀਅਮ ਤੋਂ ਅਗਮੋਰ ਰੇਲਵੇ ਸਟੇਸ਼ਨ ਤੱਕ ਰੈਲੀ ਕੱਢੀ। ਪੁਲੀਸ ਨੇ ਉਨ੍ਹਾਂ ਵੱਲੋਂ ਰੇਲ ਰੋਕਣ ਦੀ ਕੋਸ਼ਿਸ਼ ਸਫ਼ਲ ਨਾ ਹੋਣ ਦਿੱਤੀ। ਇਸ ਕਾਰਨ ਸੈਂਕੜੇ ਪਾਰਟੀ ਵਰਕਰ ਸਟੇਸ਼ਨ ਦੇ ਸਾਹਮਣੇ ਬੈਠ ਗਏ। ਪੁਲੀਸ ਨੇ ਸਟਾਲਿਨ ਨੂੰ ਪ੍ਰਦਰਸ਼ਨਕਾਰੀਆਂ ਨਾਲ ਹਿਰਾਸਤ ਵਿੱਚ ਲੈ ਲਿਆ। ਸੰਸਦ ਮੈਂਬਰ ਕਨੀਮੋੜੀ ਨੇ ਡੀਐਮਕੇ ਸਮਰਥਕਾਂ ਨਾਲ ਅੰਨਾ ਸਲਾਈ ਵਿੱਚ ਸੜਕ ਰੋਕੀ। ਉਨ੍ਹਾਂ ਨੂੰ ਪੁਲੀਸ ਨੇ ਬਾਅਦ ਵਿੱਚ ਹਿਰਾਸਤ ਵਿੱਚ ਲੈ ਲਿਆ। ਬੰਦ ਕਾਰਨ ਸਰਕਾਰੀ ਬੱਸਾਂ, ਰੇਲ ਗੱਡੀਆਂ ਆਮ ਵਾਂਗ ਚੱਲੀਆਂ ਪਰ ਆਟੋ ਰਿਕਸ਼ੇ, ਟੈਕਸੀਆਂ ਤੇ ਹੋਰ ਵਾਹਨ ਨਹੀਂ ਚੱਲੇ। ਰਾਜ ਸਰਕਾਰੀ ਤੇ ਕੇਂਦਰੀ ਅਦਾਰੇ ਆਮ ਵਾਂਗ ਖੁੱਲ੍ਹੇ ਰਹੇ।

from Punjab News – Latest news in Punjabi http://ift.tt/2cGhNuj